Dalin detaje të reja nga aksidenti i rëndë i regjistruar pasditen e së mërkurës pranë rrethrrotullimit të TEG-ut, ku një person humbi jetën dhe dy të tjerë mbetën të plagosur pas përplasjes së një kamioni pompë betoni me një automjet.

Sipas burimeve paraprake, dy personat që udhëtonin në kamionin e betonit dyshohet se janë shtetas egjiptianë. Për shkak të procedurave të identifikimit, autoritetet ende nuk kanë konfirmuar zyrtarisht identitetin e tyre dhe po vijojnë verifikimet.

Si pasojë e aksidentit, njëri prej tyre humbi jetën në vendngjarje, ndërsa personi tjetër u transportua në spital, ku ndodhet në gjendje të rëndë shëndetësore.

Ndërkohë, drejtuesi i automjetit tip "Audi", një shtetas shqiptar 28 vjeç, ka mbetur i plagosur, por sipas informacioneve paraprake ndodhet jashtë rrezikut për jetën.

Grupi hetimor vijon punën për të zbardhur rrethanat dhe shkaqet e aksidentit, ndërsa priten detaje të tjera zyrtare pas përfundimit të verifikimeve.