Të paktën 15 persona kanë mbetur të lënduar si pasojë e një aksidenti mes dy tramvajeve, i ndodhur mëngjesin e së mërkurës në Urën Erasmus, në Roterdam të Holandës.

Pamjet e publikuara në rrjetet sociale tregojnë momentin kur një tramvaj ndalon teksa hyn në urë nga drejtimi i qendrës së qytetit, ndërsa pak çaste më pas një tramvaj tjetër përplaset me të nga pas.

Sipas mediave të huaja, një prej personave të përfshirë mbeti i bllokuar në mjet dhe u nxor nga ekipet e zjarrfikësve. Ai ka pësuar lëndime të rënda dhe është transportuar në spital për trajtim mjekësor.

Kompania e transportit publik RET bëri të ditur se shkaqet e aksidentit nuk janë përcaktuar ende, ndërsa shprehu solidaritetin me të lënduarit dhe pasagjerët e përfshirë në ngjarje.

Përplasja shkaktoi gjithashtu dëme materiale në të dy tramvajet, ndërsa si masë sigurie u pezullua përkohësisht qarkullimi në linjat 3 dhe 5.

Autoritetet kanë nisur hetimet për të zbardhur rrethanat dhe shkaqet e aksidentit.