Kryetari i Partisë Demokratike, Sali Berisha, ka kundërshtuar pretendimet e qeverisë se protestat e opozitës kanë ndikuar negativisht në sektorin e turizmit, duke ia atribuar rënien e fluksit të turistëve zhvlerësimit të euros.

Gjatë një deklarate, Berisha u shpreh se plazhet në vend janë më pak të frekuentuara krahasuar me vitet e mëparshme, ndërsa fajësoi atë që e quajti “narkoeuro” për ndikimin negativ në ekonominë dhe turizmin.

“E vërteta është sot se, si kurrë më parë, plazhet e vendit janë shumë më tepër se gjysmë bosh, nga Saranda në Shëngjin dhe më lart. Faktori më shkatërrimtar për turizmin është ‘narkoeuro’, e cila ka rënë me 32 për qind. Ndërkohë, qeveria fajëson protestën për situatën në turizëm”, deklaroi Berisha.

Kreu i demokratëve akuzoi gjithashtu qeverinë se po angazhon strukturat shtetërore për të diskredituar protestat e opozitës.

Sipas tij, Policia e Shtetit, administrata publike dhe Shërbimi Informativ po përdoren për të ndikuar në perceptimin publik ndaj protestave, përfshirë edhe aktivitetin në rrjetet sociale.

Në mbledhjen e grupit parlamentar të Partisë Demokratike, Berisha u ndal edhe te procesi i reformave, duke shprehur shqetësimin për ndërprerjen, sipas tij, të konsensusit politik mbi Reformën Territoriale.

Ai u bëri thirrje mbështetësve të opozitës të mos bien pre e provokimeve dhe të vijojnë pjesëmarrjen në protestat e organizuara nga Partia Demokratike.