Një 61-vjeçar është gjetur i pajetë në det, pranë ishujve të Ksamilit në Sarandë, duke u shënuar viktima e dytë si pasojë e motit të keq që ka përfshirë jugun e vendit.

Viktima është identifikuar si Mihal Zoi, peshkatar. Sipas të dhënave paraprake, dyshohet se ai është mbytur gjatë kushteve të vështira atmosferike dhe stuhisë që përfshiu zonën mbrëmjen e kaluar.

Policia ka gjetur edhe mjetin e tij lundrues, i cili rezultonte i fundosur në det. Aktualisht, grupi hetimor po punon për zbardhjen e plotë të rrethanave të ngjarjes.

Paraprakisht, autoritetet po hetojnë mundësinë që 61-vjeçari të jetë mbytur aksidentalisht si pasojë e dallgëve dhe kushteve të këqija të motit, por nuk përjashtohen edhe pista të tjera hetimi.

Mihal Zoi ishte i divorcuar dhe fëmijët e tij jetonin në Greqi, ndërsa në Shqipëri kishte vetëm një motër.

Stuhitë e orëve të fundit kanë shkaktuar probleme të shumta në zonat bregdetare të jugut, me dëmtime të mjeteve lundruese dhe ndërhyrje të shërbimeve të emergjencës.