Dhjetëra banorë të zonës naftëmbajtëse Patos–Marinzë protestuan paraditen e së mërkurës përpara zyrave të kompanisë Bankers Petroleum, duke kërkuar shlyerjen e qirave të papaguara për tokat e tyre që shfrytëzohen nga kompania.

Sipas protestuesve, rreth 800 banorë të fshatrave Marinzë, Belinë, Sheqishte, Zharrëz, Kallm, Frashër dhe Kuman nuk kanë marrë pagesën e qirasë vjetore që nga fillimi i vitit 2026. Ata thonë se tokat e tyre përdoren nga kompania për rrugë, parkingje, sheshe teknike dhe puse nafte, në bazë të kontratave që zbatohen prej vitit 2010.

Banorët kërkojnë respektimin e kushteve kontraktuale dhe kundërshtojnë ndryshimin e kontratave nga afat njëvjeçar në dyvjeçar, si edhe uljen e vlerës së qirasë nga 400 lekë në 200 lekë për metër katror.

Protestuesit paralajmëruan se, nëse kërkesat e tyre nuk do të marrin zgjidhje, do të përshkallëzojnë reagimin, duke kërkuar edhe rikthimin e tokave në gjendjen e mëparshme.

Për banorët e zonës naftëmbajtëse Patos–Marinzë, të ardhurat nga qiraja e tokave përbëjnë një nga burimet kryesore të mbështetjes ekonomike për familjet e tyre.