Një efektiv i Policisë së Kosovës është gjetur pa shenja jete mëngjesin e së mërkurës në varrezat e fshatit Morinë, në Kukës.

Sipas njoftimit zyrtar të Policisë së Shtetit, viktima është shtetasi me inicialet Sh. H., 35 vjeç, banues në Prizren dhe punonjës i Njësisë së Reagimit të Shpejtë në Policinë e Kosovës.

Nga veprimet e para hetimore dyshohet se 35-vjeçari ka humbur jetën si pasojë e një plage të shkaktuar nga armë zjarri. Në vendngjarje është sekuestruar një pistoletë në cilësinë e provës materiale, ndërsa hetimet janë në vijim për të përcaktuar me saktësi rrethanat e ngjarjes.

Një grup i posaçëm hetimor, nën drejtimin e Prokurorisë, po vijon veprimet procedurale për zbardhjen e plotë të rastit.

Ndërkohë, Policia e Shtetit po bashkëpunon ngushtë me Policinë e Kosovës për të verifikuar nëse arma e sekuestruar është arma e shërbimit të efektivit, si dhe për sigurimin e çdo informacioni që do t’i shërbejë dokumentimit të plotë ligjor të ngjarjes.

Autoritetet nuk kanë dhënë ende detaje të tjera, ndërsa hetimet mbeten të hapura.