Dyshim i lindur në vendngjarje, polici nga Prizreni i dha fund jetës në varrezat e Morinës në Kukës

Hetimet e para në vendngjarje sugjerojnë se i riu që ishte punonjës policie në Kosovë, ka ardhur në varrezat e Morinës në Kukës dhe ka vrarë veten me armë zjarri.

Burime në vendngjarje thanë se i mëshojnë pistës së vetëvrasjes pasi konstatuan se nga arma e zjarrit ishte bërë qitje me puthitje, çka sugjeron se i ndjeri ka afruar armën drejt vetes duke e shkrepur fatalisht.

Nga policia bëhet e ditur zyrtarisht se sot rreth orës 08:25, në varrezat e fshatit Morinë është gjetur pa shenja jete shtetasi Shaban Hajdari, 35 vjeç, banues në Prizren, punonjës policie në Njësinë e Reagimit të Shpejtë në Prizren.

Nga veprimet paraprake hetimore dyshohet se 35-vjeçari ka vrarë veten me armë zjarri pistoletë, e cila u sekuestrua në cilësinë e provës materiale.

Një grup i posaçëm hetimor, nën drejtimin e Prokurorisë, po vijon veprimet për sqarimin e plotë të rrethanave të ngjarjes.

Ndërkohë, Policia e Shtetit po bashkëpunon me Policinë e Kosovës për të verifikuar nëse arma e zjarrit e sekuestruar është arma e shërbimit të 35-vjeçarit, si dhe për sigurimin e çdo informacioni që do t’i shërbejë dokumentimit të plotë ligjor të rastit.