22 korrik 2026 – Deputetja Marjana Koçeku ka reaguar pas deklaratave të kryeministrit Edi Rama, i cili hodhi poshtë pretendimet se u kishte premtuar banorëve të Thethit legalizimin e ndërtimeve pa leje.

Përmes një video-mesazhi të publikuar në rrjetet sociale, Koçeku vlerësoi se suksesi i ashtuquajtur i “Paketës së Maleve” nuk mund të matet pa zgjidhjen e çështjes së pronësisë për banorët e zonave malore.

Sipas saj, shumë familje që jetojnë prej brezash në këto zona ende nuk kanë të njohur të drejtën e pronësisë mbi tokat, kullat, pyjet dhe bjeshkët që kanë trashëguar dhe shfrytëzuar ndër shekuj.

Deputetja ngriti gjithashtu shqetësime për mungesën e infrastrukturës, duke theksuar se në disa zona mungojnë ende rrugët kryesore të asfaltuara dhe lidhjet mes fshatrave. Ajo kritikoi edhe mungesën e mbështetjes për blegtorinë, burokracitë për ndërtimin e staneve dhe vështirësitë që hasin bizneset lokale për shkak të furnizimit të paqëndrueshëm me energji elektrike.

Koçeku deklaroi se vetëm kur banorëve t’u njihet e drejta e pronësisë mbi tokën truall, tokën bujqësore, pyjore dhe bjeshkët, si dhe të krijohen kushte për zhvillimin e zonave malore, mund të flitet për suksesin e “Paketës së Maleve”.