Himarë, 22 korrik 2026 – Një ngjarje e rëndë është regjistruar në orët e para të mëngjesit në Himarë, ku një punonjës i Operatorit të Shpërndarjes së Energjisë Elektrike (OSHEE) ka humbur jetën gjatë kryerjes së detyrës.

Sipas informacioneve paraprake, ngjarja ka ndodhur rreth orës 03:00, në kohën kur ekipet teknike po punonin për rikthimin e energjisë elektrike në zonat e prekura nga moti i keq dhe erërat e forta.

Viktima është B.B., një 54-vjeçar nga Elbasani, i cili ishte dërguar në Himarë për të mbështetur ekipet lokale në riparimin e defekteve të shkaktuara në rrjetin elektrik.

Gjatë ndërhyrjes, ai ka pësuar një incident me pasojë vdekjen. Dyshimet e para janë se punonjësi mund të ketë rënë në kontakt me rrymën elektrike, megjithatë shkaku i saktë i vdekjes do të përcaktohet vetëm pas përfundimit të hetimeve dhe ekspertizës teknike.

Kujtojmë se gjatë ditës së djeshme, Himara dhe zona bregdetare u përfshinë nga stuhi të forta me reshje shiu dhe erëra intensive, të cilat shkaktuan dëme materiale dhe ndërprerje të energjisë elektrike në disa zona, duke bërë të nevojshme ndërhyrjen e ekipeve të OSHEE-së për riparimin e avarive.

Himarë / Informacion paraprak

Rreth orës 03:40, në Qendrën Shëndetësore Himarë është dërguar pa shenja jete shtetasi B. B., 54 vjeç, banues në Elbasan, punonjës sezonal i OSHEE-së.

Nga të dhënat paraprake dyshohet se shtetasi B.B, gjatë punës për riparimin e një defekti elektrik në një shtyllë, në zonën e Potamit, Himarë, ka humbur jetën.

Grupi hetimor, nën drejtimin e Prokurorisë, vijon veprimet për sqarimin e plotë të rrethanave dhe përcaktimin e shkakut të humbjes së jetës.