Fushë-Krujë, 22 korrik 2026 – Zjarri në landfillin e mbetjeve në fshatin Halil, Fushë-Krujë, vijon të mbetet aktiv në thellësi të masës së mbetjeve, pavarësisht se flakët në sipërfaqe janë shuar nga reshjet e shiut.

Gjatë gjithë natës, në terren kanë operuar forcat zjarrfikëse të Krujës, të mbështetura nga efektivët e shërbimit zjarrfikës të Institutit, në përpjekje për të vënë situatën nën kontroll.

Sipas burimeve, pritet ndërhyrja me fadroma për mbulimin e vatrës së zjarrit me dhe, metodë e konsideruar më efektive për shuarjen e plotë të zjarreve në grumbuj mbetjesh.

Shqetësim paraqet edhe afërsia e vatrës së zjarrit me depozitën që furnizon me ujë të pijshëm Fushë-Krujën dhe disa fshatra përreth, duke shtuar nevojën për monitorim të vazhdueshëm të situatës.

Ndërkohë, tymi i dendur është përhapur në një zonë të gjerë, duke prekur Fushë-Krujën, Krujën, Kamzën dhe, në varësi të drejtimit të erës, edhe Thumanën. Situata ka ngritur shqetësime për ndotjen e ajrit dhe ndikimin e mundshëm në shëndetin e banorëve.

Banorët u kanë bërë thirrje institucioneve përgjegjëse të ndërhyjnë me urgjencë për shuarjen përfundimtare të zjarrit, si dhe për monitorimin e cilësisë së ajrit dhe garantimin e sigurisë së ujit të pijshëm në zonat e prekura.