Kuvendi i Shqipërisë pritet të vendosë këtë të enjte se kur do të prezantohen raportet e Partisë Socialiste dhe Partisë Demokratike për Reformën Administrativo-Territoriale.

Seanca e fundit plenare e këtij sesioni parlamentar ishte parashikuar të mbahej më 23 korrik, ku në rendin e ditës ishte planifikuar edhe prezantimi i raporteve të dy forcave politike për punën e Komisionit të Posaçëm për Reformën Territoriale.

Megjithatë, në kalendarin zyrtar të publikuar nga Kuvendi për seancën e së enjtes, nuk është përfshirë raporti i këtij komisioni, ndërsa mandati i tij përfundoi më 15 korrik.

Të enjten paradite do të mblidhet Konferenca e Kryetarëve, ku pritet të diskutohet kalendari i punimeve për periudhën 27-31 korrik dhe mundësia e zhvillimit të një tjetër seance plenare, ku mund të përfshihet edhe prezantimi i raportit për Reformën Territoriale.

Data 27 korrik shihet si një nga mundësitë kryesore për një seancë shtesë, nëse kjo do të miratohet nga Konferenca e Kryetarëve.

Partia Socialiste ka deklaruar se raportin e saj do ta prezantojë më 23 korrik. Përveç analizës së reformës së vitit 2014, socialistët pritet të paraqesin edhe propozimin e tyre për ndarjen e re territoriale dhe numrin e bashkive.

Ndërkohë, Partia Demokratike pritet të dorëzojë në Kuvend vetëm një analizë mbi reformën e vitit 2014, pa paraqitur një propozim konkret për hartën e re territoriale.