Në një kohë kur rutina e përditshme, puna, angazhimet dhe stresi ndikojnë shpesh në marrëdhëniet në çift, gjithnjë e më shumë njerëz po i drejtohen një formule të thjeshtë që synon të rikthejë kohën cilësore dhe afërsinë emocionale.

Bëhet fjalë për të ashtuquajturin rregulli 7-7-7, një qasje që bazohet në idenë se një marrëdhënie, njësoj si çdo gjë tjetër që kërkon kujdes, ka nevojë për vëmendje dhe përpjekje të vazhdueshme.

Sipas kësaj metode, çiftet duhet të ndjekin tre hapa kryesorë:

Çdo 7 ditë: Partnerët duhet të organizojnë një takim vetëm për veten e tyre. Mund të jetë një darkë, një shëtitje, një kafe apo një aktivitet i përbashkët. Qëllimi është shkëputja nga rutina dhe rikthimi i momenteve që i kanë afruar në fillim të lidhjes.

Çdo 7 javë: Sugjerohet një fundjavë larg ambientit të zakonshëm. Një udhëtim i shkurtër mund të ndihmojë çiftin të krijojë kujtime të reja, të komunikojë më lirshëm dhe të rikthejë energjinë në marrëdhënie.

Çdo 7 muaj: Rregulli rekomandon një pushim më të gjatë vetëm si çift, për të kaluar më shumë kohë së bashku, për të forcuar intimitetin dhe për t’i dhënë lidhjes një “rifreskim”.

Megjithatë, ekspertët e marrëdhënieve theksojnë se kjo nuk është një formulë magjike që garanton sukses, por një kujtesë se lidhjet kërkojnë kujdes të vazhdueshëm dhe angazhim nga të dy partnerët.

Sipas kësaj filozofie, momente të vogla, por të planifikuara rregullisht, mund të ndihmojnë çiftet të ruajnë afërsinë dhe të mos lejojnë që përditshmëria të zbehë emocionet e fillimit.