Numri i mjeteve rrugore në Shqipëri ka kaluar për herë të parë pragun e 1 milion njësive. Sipas të dhënave për vitin 2025, në vend rezultonin të regjistruara 1 milion e 48 mijë mjete me status aktiv ose të çregjistruara përkohësisht, duke shënuar një rritje prej 9.3% krahasuar me një vit më parë.

Pjesën më të madhe të parkut automobilistik e përbëjnë autoveturat, të cilat zënë 80.8% të totalit. Rritja e numrit të makinave ka ndikuar edhe në nivelin e motorizimit, ku në vitin 2025 u regjistruan 361 autovetura për çdo 1 mijë banorë, nga 326 që ishte ky tregues në vitin 2024.

Tirana vijon të mbajë peshën kryesore të numrit të mjeteve në vend, me 34.7% të totalit të regjistrimeve. Pas saj renditet Durrësi me 13.6% dhe Fieri me 9.1%. Megjithatë, kur numri i automjeteve përllogaritet në raport me popullsinë, qarku i Durrësit rezulton më i motorizuari në Shqipëri, me 535 autovetura për çdo 1 mijë banorë.

Pavarësisht rritjes së numrit të automjeteve, të dhënat tregojnë se parku rrugor shqiptar vijon të jetë i vjetër. Rreth 55.3% e mjeteve janë prodhuar gjatë periudhës 2000-2010, ndërsa 45.7% e autoveturave kanë një moshë nga 11 deri në 20 vjet.

Në tregun shqiptar dominojnë ende automjetet me kambio manuale, të cilat përbëjnë 55.9% të totalit, edhe pse makinat me kambio automatike po shtohen me ritme të shpejta. Për sa i përket markave, Volkswagen kryeson me 19.7% të autoveturave në qarkullim, i ndjekur nga Mercedes-Benz me 18.1%.

Nafta mbetet karburanti dominues në Shqipëri, me 72.1% të autoveturave që përdorin këtë lëndë djegëse gjatë vitit 2025. Megjithatë, tregu i automjeteve elektrike po njeh një rritje të ndjeshme, me një shtim prej 91.2% brenda një viti, duke treguar një prirje të re drejt mjeteve më pak ndotëse.