Gjatë tri dekadave në krye të politikës izraelite, Benjamin Netanyahu ka përballuar shumë kundërshtarë politikë, por përballë tij tashmë është shfaqur një rival me një profil krejt ndryshe: Gadi Eisenkot, ish-shefi i Shtabit të Përgjithshëm të Ushtrisë së Izraelit.

Në moshën 66-vjeçare, Eisenkot nuk ka një karrierë të gjatë politike dhe nuk ka drejtuar më parë një ministri qeveritare. Megjithatë, ai është shndërruar në një nga figurat më të fuqishme të kampit kundër Netanyahut dhe në disa sondazhe ka kaluar kryeministrin aktual për sa i përket mbështetjes publike.

Eisenkot i përket traditës së ish-gjeneralëve izraelitë që kanë hyrë në politikë, një rrugë e ndjekur më herët nga figura si Yitzhak Rabin, Ehud Barak dhe Ariel Sharon. Analistët e cilësojnë si një kandidat "anti-Netanyahu", jo për shkak të një retorike të fortë politike, por për shkak të profilit të tij si ushtarak, reputacionit për integritet dhe perceptimit si një figurë më pak përçarëse.

I lindur në Eilat, në një familje hebrenjsh me origjinë marokene, Eisenkot ndërtoi karrierën në ushtri, duke nisur nga Brigada Golani dhe duke përfunduar në postin e shefit të shtabit të ushtrisë izraelite nga viti 2015 deri në vitin 2019. Gjatë kësaj periudhe ai u bë i njohur për doktrinën e tij të përdorimit të forcës së madhe ndaj kundërshtarëve të Izraelit, edhe pse gjatë drejtimit të ushtrisë ai ndoqi një qasje më të kufizuar operacionale.

Pas sulmit të Hamasit më 7 tetor 2023, Eisenkot iu bashkua kabinetit të emergjencës së luftës të Netanyahut si ministër pa portofol. Megjithatë, ai u largua nga qeveria në vitin 2024 pas përplasjeve me kryeministrin lidhur me strategjinë e luftës në Gaza dhe menaxhimin e negociatave për lirimin e pengjeve.

Rritja e tij politike është ndikuar edhe nga një tragjedi personale. Djali i tij, Gal Eisenkot, një ushtar rezervist, humbi jetën në luftime në Gaza në dhjetor 2023, ndërsa më pas humbën jetën edhe dy nipër të tij gjatë luftës. Ngjarja krijoi një lidhje emocionale me shumë qytetarë izraelitë, të cilët e panë atë si një figurë që kishte paguar një çmim personal në konflikt.

Në vitin 2025, Eisenkot krijoi partinë centriste "Yashar" ("I Drejti"), pasi u nda nga aleanca politike e Benny Gantz. Sipas sondazheve të fundit, partia e tij ka kaluar në disa raste Likudin e Netanyahut, ndërsa vetë Eisenkot ka marrë rezultate më të mira se kryeministri kur qytetarët pyeten se kush do të ishte udhëheqës më i përshtatshëm për vendin.

Fushata e tij politike bazohet më shumë te ideja e rikthimit të besimit te institucionet, përgjegjësisë shtetërore dhe bashkimit të shoqërisë izraelite, sesa te një program i detajuar për çështje si Gaza apo Irani. Ai ka kritikuar Netanyahun për mungesë përgjegjësie politike dhe ka kërkuar krijimin e një komisioni hetimor për dështimet e sigurisë para sulmit të 7 tetorit.

Netanyahu, nga ana tjetër, është përpjekur ta portretizojë Eisenkotin dhe gjeneralët e tjerë opozitarë si figura të majta që do të dobësonin sigurinë e Izraelit. Eisenkot i ka kundërshtuar këto akuza, duke theksuar se bindjet e tij për sigurinë kombëtare janë të forta dhe se ai nuk ka mbështetur krijimin e një shteti palestinez pa kushte të qarta sigurie për Izraelin.

Megjithatë, sfida e tij mbetet e vështirë. Edhe nëse opozita fiton më shumë mbështetje, formimi i një koalicioni qeverisës kërkon arritjen e shumicës prej 61 mandatesh në Knesset. Qëndrimi i Eisenkotit ndaj partive arabo-izraelite dhe mundësia e bashkëpunimit me to mund të jetë një nga faktorët vendimtarë në formimin e qeverisë së ardhshme.

Për shumë analistë, suksesi i Eisenkotit lidhet pikërisht me atë që dikur shihej si dobësi e tij: mungesa e një karizme tipike politike. Në një shoqëri të lodhur nga polarizimi dhe krizat e viteve të fundit, shumë izraelitë po kërkojnë një figurë që u rikthen ndjenjën e besimit dhe stabilitetit. Financial Times