Protestuesit kanë përfunduar fjalimet e tyre para Kryeministrisë dhe kanë nisur marshimin në rrugët e kryeqytetit, duke shënuar ditën e 52-të të protestës së tyre.

Me pankarta në duar dhe nën thirrjet “Shqipëria e shqiptarëve, vdekje tradhtarëve” dhe “Ju erdhi fundi”, qytetarët kanë vijuar tubimin, duke përcjellë mesazhet e tyre kundër qeverisjes së këtyre viteve.

Gjatë protestës, dhjetëra qytetarë kanë marrë fjalën në podiumin e vendosur përpara godinës së Kryeministrisë, ku kanë shprehur pakënaqësitë e tyre dhe kanë përsëritur kërkesat për ndryshim politik.

Protestuesit kanë deklaruar se qëndrimi i tyre mbetet i pandryshuar dhe se nuk pranojnë negociata për kërkesat e paraqitura. Ata kanë refuzuar gjithashtu një dialog me kryeministrin Edi Rama, duke kërkuar plotësimin e pikave të tyre përpara çdo komunikimi të mëtejshëm.

Marshimi në rrugët e Tiranës vijon nën praninë e qytetarëve të grupmoshave të ndryshme, të cilët prej 52 ditësh marrin pjesë në protestën kundër qeverisë.