Një prej pjesëmarrësve në protestën e zhvilluar këtë të martë para Kryeministrisë deklaroi se lëvizja qytetare do të vijojë deri në plotësimin e kërkesave të saj, ndërsa akuzoi qeverinë për korrupsion dhe keqmenaxhim.

Në një prononcim për mediat, protestuesi u shpreh se kryeministri Edi Rama ka humbur mbështetjen e një numri të madh qytetarësh, duke e cilësuar atë si "një mbret pa popull". Ai kritikoi gjithashtu deklaratat e ministrit Blendi Gonxhja, i cili, sipas tij, pretendoi se protesta kishte dëmtuar zhvillimin e një koncerti.

Sipas protestuesit, qytetarët prej 52 ditësh janë në shesh për të kundërshtuar korrupsionin, abuzimet dhe, siç u shpreh ai, "klasën politike të 36 viteve", duke shtuar se qeveria po përpiqet të minimizojë dhe diskreditojë protestën.

"Mbret pa popull, kjo është kurora e Edi Ramës, pasi ai ka humbur mbështetjen e 800 mijë votuesve. Kryeministri e di shumë mirë pse protestojmë prej 52 ditësh. Jemi këtu kundër korrupsionit, mashtrimeve dhe klasës së kalbur politike. Ata e kanë humbur legjitimitetin dhe përpiqen të hedhin deklarata të ndryshme që të largojnë vëmendjen nga kërkesat tona," deklaroi protestuesi.