Aktorja amerikane Kaylee Hottle, e njohur për interpretimin e personazhit Jia në filmat Godzilla vs. Kong dhe Godzilla x Kong: The New Empire, ka humbur jetën në moshën 18-vjeçare pas një aksidenti automobilistik në shtetin e Maryland, SHBA. Lajmi është konfirmuar nga babai i saj, Joshua Hottle.

Sipas mediave amerikane, e reja ishte pasagjere në automjetin që u përfshi në aksident. Autoritetet njoftuan se ajo nuk arriti t’u mbijetonte plagëve të marra, ndërsa rrethanat e ngjarjes mbeten nën hetim.

Kaylee Hottle nisi karrierën në moshë të vogël, fillimisht në reklama, ndërsa u bë e njohur ndërkombëtarisht me rolin e Jia-s, vajzës së shurdhër që komunikonte me Kongun përmes gjuhës së shenjave. Interpretimi i saj u vlerësua gjerësisht për përfaqësimin autentik të komunitetit të personave me aftësi të kufizuara në dëgjim.

Përveç filmave të sagës "Godzilla", Hottle ishte shfaqur edhe në serialin Magnum P.I. dhe ishte nominuar për një çmim Saturn për interpretimin e saj në Godzilla x Kong: The New Empire. Vdekja e saj ka ngjallur reagime të shumta në industrinë e filmit dhe në komunitetin e personave që komunikojnë me gjuhën e shenjave.