Deputetja Marjana Koçeku ka folur sërish për vendimin e saj për t’u larguar nga Partia Socialiste, duke zbuluar se askush nuk ishte vënë në dijeni paraprakisht dhe se vendimin e mësuan përmes postimit të saj në rrjetet sociale.

E ftuar në News24, Koçeku deklaroi se pas njoftimit publik ka marrë telefonata nga drejtues të Partisë Socialiste, mes tyre edhe kryeministri Edi Rama. Ajo tha se me kreun e qeverisë komunikoi disa ditë më vonë, duke i bërë të qartë se largimi ishte një vendim përfundimtar.

"Kam pasur shumë telefonata nga drejtues të PS-së dhe nga kryeministri. Ramës ia komunikova më vonë se ky ishte një hap përfundimtar dhe nuk do të kishte tërheqje mbrapa. Ka pasur tentativa, por ky është vendimi im", u shpreh Koçeku.

Deputetja tha se kohët e fundit ka vënë re pakënaqësi brenda Partisë Socialiste, duke shtuar se shpreson që anëtarët dhe përfaqësuesit e saj të gjejnë kurajën për të ushtruar përgjegjësitë që u janë besuar.

Duke komentuar kërcënimet që ka deklaruar më herët se ka marrë nga fisi Bajri, Koçeku u shpreh se reagimin e saj e ka bërë tashmë publik dhe nuk dëshiron të shtojë më tej mbi këtë çështje.

"Reagimin tim për kërcënimet e kam bërë publik. Jam mjaftuar me atë mesazh dhe ai ka qenë mbi baza të forta", deklaroi deputetja.

Koçeku theksoi gjithashtu se dëshiron të respektojë privatësinë e personave që e kanë mbështetur gjatë këtij procesi, ndërsa ritheksoi se vendimi për t’u larguar nga Partia Socialiste është i pakthyeshëm.