Rritja e çmimit të karburanteve në vend ka sjellë reagimin e deputetit të Partisë Socialiste, Erion Braçe, i cili ka kërkuar rikthimin e Bordit të Transparencës për monitorimin e tregut të hidrokarbureve.

Reagimi i tij vjen pasi çmimi i naftës në pikat e tregtimit në Shqipëri ka arritur në 206 lekë për litër.

Sipas Braçes, tregtarët nuk reflektuan uljen e çmimeve në tregjet ndërkombëtare gjatë javëve të fundit, ndërsa rritjet po i zbatojnë menjëherë në tregun vendas.

Deputeti thekson se për rreth tre javë, kur çmimi i naftës në bursat ndërkombëtare ishte në rënie, çmimi në Shqipëri mbeti i pandryshuar. Ndërsa me ndryshimin e tendencës, sipas tij, karburantet në vend janë shtrenjtuar më shumë sesa në vendet europiane.

"Ndërkohë që në Europë çmimi i karburanteve është rritur me rreth 16 cent për litër, në Shqipëri rritja ka qenë rreth 32 cent për litër", argumenton Braçe.

Ai ngriti shqetësim edhe për çmimin e gazit, duke theksuar se ky produkt nuk ka njohur ulje, ndërsa shtoi se edhe gjatë periudhës kur funksiononte Bordi i Transparencës nuk u morën vendime për rregullimin e çmimit të tij.

Përmes reagimit të tij, Braçe kërkon rikthimin e mekanizmit të Bordit të Transparencës, me argumentin se ai do të mundësonte një kontroll më të madh mbi mënyrën se si reflektohen luhatjet e tregjeve ndërkombëtare në çmimet e karburanteve në Shqipëri.