Autoritetet italiane kanë goditur një tjetër rast të trafikut ndërkombëtar të drogës, duke sekuestruar mbi 770 kilogramë kokainë me pastërti të lartë në portin e Vado Ligure, në veriperëndim të Italisë.

Sipas autoriteteve italiane, operacioni është zhvilluar nga Guardia di Finanza në bashkëpunim me Agjencinë e Doganave.

Lënda narkotike ishte e fshehur në 650 pako, të vendosura mes dhjetëra paletave me banane brenda një kontejneri frigoriferik që kishte mbërritur nga një prej porteve kryesore të Ekuadorit.

Sipas vlerësimeve të autoriteteve, ngarkesa e sekuestruar kap një vlerë prej rreth 250 milionë eurosh në tregun e zi.

Hetimet vijojnë për identifikimin e rrjetit kriminal përgjegjës dhe përcaktimin e destinacionit përfundimtar të drogës.

Autoritetet italiane e kanë cilësuar operacionin si një nga goditjet më të mëdha ndaj trafikut të narkotikëve në portin e Vado Ligure gjatë viteve të fundit. Vetëm pak javë më parë, në të njëjtin port u sekuestruan edhe 340 kilogramë kokainë.