Një aksident rrugor është regjistruar rreth mesditës së kësaj të marte në qytetin e Elbasanit, ku një grua ka mbetur e plagosur pasi është përplasur nga një automjet.

Ngjarja ka ndodhur pranë Universitetit “Aleksandër Xhuvani”. Sipas informacioneve paraprake, gruaja po tentonte të kalonte nga njëra anë e rrugës në tjetrën, kur është goditur nga një automjet që po qarkullonte në atë segment rrugor.

Menjëherë pas aksidentit, qytetarët e pranishëm dhe shërbimet e urgjencës kanë ndërhyrë për t’i dhënë ndihmën e parë të lënduarës. Më pas, ajo është transportuar me ambulancë në Spitalin Rajonal të Elbasanit, ku po merr trajtim mjekësor në repartin e kirurgjisë.

Policia ka mbërritur në vendngjarje dhe ka nisur hetimet për të zbardhur rrethanat e aksidentit, si dhe për të përcaktuar përgjegjësitë e drejtuesit të automjetit.

Gjendja shëndetësore e gruas nuk është bërë ende e ditur.