Ushtruesja e detyrës së Presidentes së Kosovës, Albulena Haxhiu, ka nënshkruar dekretet për lirimin nga detyra të shtatë prokurorëve nga komuniteti serb, të cilët kishin dhënë dorëheqje nga sistemi i drejtësisë në nëntor të vitit 2022.

Përmes një reagimi në rrjetet sociale, Haxhiu deklaroi se me këtë vendim përmbyllet një proces i zgjatur dhe zbatohet vendimi i institucionit kompetent në përputhje me Kushtetutën dhe ligjet e Kosovës.

“Me këtë akt përmbyllet një proces i zgjatur për vite me radhë dhe zbatohet vendimi i institucionit kompetent, në përputhje me Kushtetutën dhe ligjet e Republikës së Kosovës”, u shpreh ajo.

Vendimi vjen pasi Këshilli Prokurorial i Kosovës refuzoi më herët gjatë kësaj jave kërkesën e shtatë prokurorëve për tërheqjen e dorëheqjeve të paraqitura në vitin 2022. Propozimi u miratua nga Këshilli me iniciativën e nënkryetarit Dardan Vuniqi, ndërsa hyrja në fuqi kërkonte dekretin e ushtrueses së detyrës së presidentes.

Haxhiu theksoi se askush nuk mund të pengojë funksionimin e institucioneve apo të krijojë paqartësi juridike përmes proceseve të papërfunduara, duke shtuar se institucionet e Kosovës do të vazhdojnë të veprojnë në zbatim të ligjit dhe në mbrojtje të integritetit institucional.

Dorëheqjet e zyrtarëve serbë nga policia, prokuroria, gjyqësori dhe institucionet e tjera në katër komunat me shumicë serbe në veri të Kosovës u paraqitën në nëntor të vitit 2022, pas thirrjes së Listës Serbe për largim kolektiv në shenjë proteste ndaj vendimit të Qeverisë së Kosovës për riregjistrimin e automjeteve me targa të lëshuara nga Serbia.

Ndërkohë, Këshilli Gjyqësor i Kosovës ka bërë të ditur se ende nuk ka marrë një vendim për kërkesat e gjyqtarëve serbë që kanë kërkuar të tërheqin dorëheqjet e tyre. Nga ana tjetër, Bashkimi Evropian ka deklaruar se kjo çështje po trajtohet në kuadër të dialogut për normalizimin e marrëdhënieve ndërmjet Kosovës dhe Serbisë.