Procesi gjyqësor ndaj kryetarit të Bashkisë së Tiranës, Erion Veliaj, dhe bashkëshortes së tij, Ajola Xoxa, është shtyrë për në muajin shtator nga Gjykata e Posaçme. Të dy të pandehurit po përballen me akuza për korrupsion, pastrim parash dhe fshehje pasurie.

Në seancën e zhvilluar këtë të martë, Erion Veliaj nuk ishte i pranishëm në sallën e gjyqit. Përmes një kërkese me shkrim, ai kishte shprehur vullnetin për t’u përfaqësuar nga avokati i tij, Plarent Ndreca.

Avokati Ndreca kishte kërkuar shtyrjen e seancës, duke argumentuar se ndodhej në një proces tjetër gjyqësor në Gjykatën e Tiranës, në Dhomën Civile, ku palë e paditur është Arbjan Mazniku. Sipas gjykatës, mbrojtësi kishte paraqitur pretendimin se ndodhej në “pamundësi objektive” për të marrë pjesë në seancë.

Edhe mbrojtja e Ajola Xoxës kërkoi shtyrjen e procesit, duke argumentuar mungesën e saj për shkak të gjendjes shëndetësore. Avokati Gurali Brahimllari deklaroi se klientja e tij kishte kryer një konsultë mjekësore dhe vijonte të ishte në të njëjtën situatë shëndetësore, çka sipas tij e pengonte të merrte pjesë në proces.

Nga ana tjetër, prokurori i SPAK, Ols Dado, kundërshtoi kërkesat e mbrojtjes, duke argumentuar se pengesa për zhvillimin e seancës ishte mungesa e mbrojtjes së Veliajt. Ai kërkoi caktimin e një mbrojtësi kryesisht për të pandehurin, vendosjen e një gjobe sipas vlerësimit të gjykatës dhe pezullimin e afateve të paraburgimit.

Në lidhje me raportin mjekësor të Ajola Xoxës, prokurori deklaroi se gjykata ishte shprehur më herët për këtë çështje, duke pretenduar se gjendja shëndetësore e saj nuk përbënte pengesë për pjesëmarrjen në proces.

Pas konsultimit në dhomën e këshillimit, trupi gjykues vendosi që seanca të vijonte pa praninë e Ajola Xoxës, duke arsyetuar se raporti mjekësor nuk provonte pamundësinë e saj për të marrë pjesë në gjykim. Gjykata vendosi gjithashtu vijimin e seancës pa praninë e Erion Veliajt dhe gjobiti avokatin e tij, Plarent Ndreca, për mungesën.

Po ashtu, për kryebashkiakun e Tiranës u caktua një avokate kryesisht, Valentina Teodoresku, e cila më herët ka qenë pjesë e kësaj dosjeje dhe ka ushtruar mbrojtjen e tij.

Seanca e radhës është caktuar të zhvillohet më 15 shtator.