SHBA – Ismael “El Mayo” Zambada, bashkëthemelues i Kartelit Sinaloa dhe një nga figurat më të njohura të trafikut ndërkombëtar të drogës, pritet të dënohet këtë të hënë me burgim të përjetshëm në Shtetet e Bashkuara.

76-vjeçari ka pranuar gjithashtu konfiskimin e pasurive me vlerë deri në 15 miliardë dollarë, një nga urdhrat më të mëdhenj të konfiskimit të pasurive në historinë e sistemit amerikan të drejtësisë penale.

Zambada themeloi Kartelin Sinaloa në fund të viteve 1980 së bashku me Joaquín “El Chapo” Guzmán dhe për dekada konsiderohej strategu kryesor i organizatës kriminale.

Gjatë vitit të kaluar ai pranoi fajësinë për drejtimin e një organizate kriminale dhe pjesëmarrje në një komplot të krimit të organizuar, në kuadër të një marrëveshjeje me autoritetet amerikane.

Sipas prokurorëve federalë në Bruklin, Zambada ishte për dekada "një nga trafikantët më të fuqishëm dhe më aktivë të drogës në botë". Prokuroria pretendon se, nën drejtimin e tij, Karteli Sinaloa shpërndau të paktën 1.5 milionë kilogramë kokainë, ndërsa zgjeroi aktivitetin edhe në trafikun e heroinës dhe fentanilit.

Dokumentet e paraqitura në gjykatë e akuzojnë organizatën për vrasje, rrëmbime dhe përdorimin e metodave të sofistikuara për trafikimin e drogës drejt Shteteve të Bashkuara, përfshirë tunele nëntokësore dhe linja hekurudhore ndërkufitare.

Megjithatë, ekspertët e çështjeve të konfiskimit të pasurive vlerësojnë se autoritetet amerikane mund ta kenë të vështirë të sekuestrojnë të gjithë shumën prej 15 miliardë dollarësh.

“Derisa të identifikohen dhe lokalizohen asetet, kjo mbetet vetëm një shifër në letër”, deklaroi për Financial Times Stefan Cassella, ish-specialist federal për konfiskimin e pasurive.

Ndërkohë, mbrojtja ligjore e Zambadës ka kërkuar që ai të mos vuajë dënimin në të njëjtin burg federal të sigurisë maksimale ku ndodhet Joaquín “El Chapo” Guzmán, duke argumentuar se klienti i tyre ka bashkëpunuar me drejtësinë dhe ka pranuar përgjegjësinë për veprat penale.

Arrestimi dhe ekstradimi i Zambadës në Shtetet e Bashkuara në vitin 2024 shkaktoi një përplasje të ashpër brenda Kartelit Sinaloa. Sipas raportimeve lokale, konflikti mes fraksioneve rivale ka shkaktuar mijëra viktima dhe persona të zhdukur në shtetin me të njëjtin emër në Meksikë.