Lionel Messi ka reaguar për herë të parë pas humbjes së Argjentinës në finalen e Kupës së Botës 2026 ndaj Spanjës. Kapiteni i "Albiceleste" ndau një mesazh emocional në rrjetet sociale, ku pranoi zhgënjimin për humbjen, por vlerësoi rrugëtimin e skuadrës gjatë turneut.

"Dhimbja është shumë e madhe dhe do të jetë e vështirë që kjo plagë të mbyllet. Por mbetem me gjithçka të mirë që kemi bërë. Me ndeshjet që përmbysëm duke dhënë gjithçka dhe që do të mbeten përgjithmonë në kujtesë", shkroi Messi.

39-vjeçari falënderoi tifozët për mbështetjen, duke theksuar se Argjentina arriti të luante për herë të dytë radhazi në finalen e Kupës së Botës.

"Sot është e vështirë të vlerësojmë atë që kemi bërë, por ky grup arriti në dy finale radhazi të Kupës së Botës. Faleminderit nga zemra për çdo përshëndetje dhe çdo mesazh. Edhe një herë arritëm të bashkojmë një vend të tërë dhe të ndajmë krenarinë për të qenë argjentinas", vijoi ai.

Messi ishte një nga protagonistët kryesorë të Argjentinës gjatë Botërorit, por në finalen ndaj Spanjës nuk arriti të ndryshonte fatin e ndeshjes.

Në përfundim të reagimit të tij, kapiteni argjentinas uroi edhe Spanjën për triumfin në Kupën e Botës.

"Dua gjithashtu të përgëzoj Spanjën për kampionatin", përfundoi Messi.