Ngjarjet që pasuan përfundimin e finales mes Spanjës dhe Argjentinës vijojnë të jenë në qendër të vëmendjes, ndërsa FIFA pritet të shqyrtojë incidentet e ndodhura pas vërshëllimës përfundimtare.

Sipas raportimeve të mediave të huaja, organi qeverisës i futbollit botëror synon të hetojë përplasjet mes futbollistëve dhe anëtarëve të stafeve teknike, me qëllim identifikimin e përgjegjësve dhe marrjen e masave disiplinore.

Në qendër të kritikave është Leandro Paredes, i cili, pasi ishte ndëshkuar gjatë ndeshjes, u përjashtua pas një përplasjeje me Gavin gjatë festimeve të kombëtares spanjolle.

Në incident u përfshi edhe Nahuel Molina, i cili akuzohet se goditi Rodrin teksa kapiteni i Spanjës po festonte me shokët e skuadrës. Situata më pas degradoi në një përleshje ku u përfshinë lojtarë nga të dyja ekipet, si edhe anëtarë të stafeve teknike.

Sipas të njëjtave burime, mes të përfshirëve ishte edhe ndihmëstrajneri i Argjentinës, Roberto Ayala, për të cilin raportohet se pati një përplasje fizike me Dani Olmon.

Deri më tani, FIFA nuk ka konfirmuar zyrtarisht nisjen e procedurave disiplinore, por mediat ndërkombëtare raportojnë se çështja është duke u shqyrtuar dhe nuk përjashtohet vendosja e sanksioneve të reja ndaj personave të përfshirë në incident.