Reforma e re territoriale ka sjellë përplasje politike në Kuvend mes Partisë Socialiste dhe Partisë Demokratike. Opozita ka akuzuar mazhorancën se po vijon procesin pa pritur përfundimin e punës së komisionit të posaçëm, ndërsa socialistët kanë deklaruar se ende nuk ka një vendim përfundimtar për ndarjen e re administrative.

Deputetët demokratë pretendojnë se është parashikuar shkrirja e rreth 20 bashkive, duke ngritur shqetësime për pasojat që një ndryshim i tillë mund të sjellë për komunitetet lokale.

Kreu i PD-së, Sali Berisha, deklaroi se qeveria po tërhiqet nga një reformë gjithëpërfshirëse territoriale dhe po vijon, sipas tij, një politikë që çon në shpopullimin e mëtejshëm të vendit.

“A shkrihet Mirdita? Mos i bëni atentat Shqipërisë”, u shpreh deputeti demokrat Agron Gjekmarkaj, ndërsa deputetja Ina Zhupa kundërshtoi mundësinë e prekjes së bashkive si Delvina dhe Konispoli.

Nga ana tjetër, përfaqësuesit e Partisë Socialiste hodhën poshtë pretendimet e opozitës. Taulant Balla deklaroi se nuk ka një draft përfundimtar dhe se pretendimet për shkrirjen e bashkive janë të parakohshme.

“U tha këtu Kruma (Hasi). Nuk shkrihet as Mirdita”, reagoi Balla gjatë debatit në Kuvend.

Edhe Ardit Bido u shpreh se diskutimet për ndryshime konkrete nuk mund të bëhen pa u prezantuar më parë harta e re territoriale.

Bashkëkryetari demokrat i komisionit të reformës territoriale, Luçiano Boçi, kërkoi që mazhoranca të tërhiqet nga drafti dhe të shtyjë afatin e punës së komisionit. Ndërkohë, PS ka njoftuar se më 23 korrik do të paraqesë raportin e punës së deritanishme.

Sipas Taulant Ballës, në këtë fazë nuk do të ketë votim për një ndarje të re territoriale, por vetëm një raportim mbi procesin, i cili më pas do të vijojë me përfshirjen e komuniteteve.

Në mbledhjet e fundit të komisionit të posaçëm, Partia Socialiste ka bërë të ditur se po shqyrton një model me më pak bashki dhe krijimin e rajoneve, si pjesë e reformës së propozuar territoriale.