Keir Starmer ka mbajtur fjalimin e tij të fundit si kryeministër i Mbretërisë së Bashkuar, përpara dorëzimit zyrtar të detyrës te pasardhësi i tij, Andy Burnham. Në deklaratën e mbajtur jashtë selisë qeveritare në Downing Street, Starmer e përmbylli fjalimin me mesazhin: “Puna ime ka mbaruar”.

Gjatë fjalës së tij, Starmer bëri një përmbledhje të rrugëtimit të tij politik, duke kujtuar drejtimin e Partisë Laburiste për rreth gjashtë vite e gjysmë dhe transformimin e saj nga humbja në zgjedhjet e vitit 2019 në një forcë fituese që siguroi shumicë të gjerë parlamentare në zgjedhjet e vitit 2024.

Ai e cilësoi postin e kryeministrit si nderin më të madh të jetës së tij, duke deklaruar se beson se Mbretëria e Bashkuar është sot më e fortë dhe më e drejtë se dy vite më parë.

Sipas Starmer, gjatë mandatit të tij janë ndërmarrë hapa për uljen e varfërisë së fëmijëve, kufizimin e imigracionit, forcimin e mbrojtjes dhe përmirësimin e rolit ndërkombëtar të vendit. Ai vlerësoi gjithashtu punën e qytetarëve britanikë, nga pjesëtarët e forcave të armatosura dhe punonjësit e Shërbimit Kombëtar Shëndetësor deri te miliona vullnetarë në komunitete.

Në fjalimin e tij, Starmer u ndal edhe te sfidat globale, duke theksuar rëndësinë e unitetit kombëtar në një periudhë që, sipas tij, karakterizohet nga kërcënime dhe përpjekje për përçarje, përfshirë qëndrimin e Britanisë në mbështetje të Ukrainës.

Në fund të deklaratës, ai i uroi sukses kryeministrit të ri, falënderoi stafin e Downing Street dhe bashkëshorten e tij, Victoria Starmer, për mbështetjen gjatë mandatit. Ai tha se largohet me krenari për punën e realizuar nga qeveria e tij.

Mbreti Charles pranon dorëheqjen e Starmer

Keir Starmer ka paraqitur zyrtarisht dorëheqjen nga posti i kryeministrit të Mbretërisë së Bashkuar, e cila është pranuar nga Mbreti Charles.

Sipas Pallatit Buckingham, Starmer u takua me monarkun të hënën në mëngjes dhe i dorëzoi dorëheqjen nga detyrat e Kryeministrit dhe Lordit të Parë të Thesarit. Në takim mori pjesë edhe bashkëshortja e tij, Victoria Starmer.

Pas pranimit të dorëheqjes, pritet kalimi zyrtar i detyrës te kryeministri i ri.