Një 58-vjeçar, i cili ishte shpallur i humbur prej dy ditësh, është gjetur pa shenja jete në brendësi të një guve në fshatin Drizë, në bashkinë e Kuçovës.

Familjarët kishin denoncuar në polici zhdukjen e tij, pasi ai nuk ishte kthyer në banesë, duke kërkuar ndihmë për lokalizimin e tij. Sipas informacioneve paraprake, kërkimet u përqendruan në zonën ku banorë të fshatit kishin deklaruar se e kishin parë për herë të fundit.

Pas operacionit të kërkimit, 58-vjeçari, Gramoz Grymshi, u gjet i pajetë në brendësi të guvës. Nga këqyrja paraprake e trupit nuk janë konstatuar shenja dhune.

Dyshohet se shkaku i vdekjes mund të ketë qenë mungesa e oksigjenit brenda guvës, megjithatë rrethanat e ngjarjes mbeten nën hetim. Trupi është dërguar në morgun e Spitalit Rajonal të Beratit, ku do t’i nënshtrohet ekspertizës mjeko-ligjore për përcaktimin e shkakut të saktë të vdekjes.

Autoritetet vijojnë veprimet hetimore për zbardhjen e plotë të ngjarjes.