Ish-presidenti i Shqipërisë, Bamir Topi, ka deklaruar se Presidenca nuk ka pasur kompetencë në procesin e privatizimit të pronës që lidhet me dosjen “Partizani”, për të cilën po zhvillohet proces gjyqësor.

Pas dëshmisë së dhënë në gjykatë, Topi u shpreh para mediave se roli i Presidentit në atë periudhë kufizohej në procedurat formale, ndërsa vendimmarrja për privatizimin nuk ishte pjesë e kompetencave të institucionit që ai drejtonte.

“Në kuadrin e reformave kishte tre dimensione: politik, qeveria dhe Ministria e Mbrojtjes; ekspertiza dhe procedurat zyrtare, ku dokumentet paraqiteshin për firmën e Presidentit. Kjo është një çështje në gjykim. Ajo që mund të them është se nuk ka qenë kompetencë e Presidentit të privatizojë prona”, deklaroi Topi.

Ai theksoi se ngjarjet lidhen me një periudhë reformash të rëndësishme në sektorin e mbrojtjes, në kuadër të përgatitjeve të Shqipërisë për anëtarësimin në NATO, proces që sipas tij mbështetej edhe nga ekspertë të Aleancës.

Në përfundim, ish-presidenti sqaroi se një pronë që del nga plani i përhapjes mbetet fillimisht pronë shtetërore dhe më pas mund të ndjekë disa rrugë ligjore.

“Një pronë që del nga plani i përhapjes mbetet pronë shtetërore. Më pas ajo mund të mbetet e tillë, të transferohet te bashkia ose të hyjë në proces privatizimi. Mënyra se si realizohet kjo nuk ka qenë kompetencë e imja”, u shpreh Topi.