Trupat e pajetë të tre qytetarëve nga Kosova që humbën jetën tragjikisht në aksidentin rrugor pranë pikëkalimit kufitar Hani i Elezit–Bllacë, do të transportohen drejt Kosovës sapo të përfundojnë procedurat e nevojshme ligjore.

Deklarata është bërë nga Ambasadori i Kosovës në Shkup, Florian Qehaja, i cili u shprehu ngushëllimet e sinqerta familjarëve të viktimave: Ejup Tërnava, Cennet Tërnava dhe Fatmire Shabani.

Qehaja bëri të ditur se Ambasada e Kosovës ka qenë në koordinim të vazhdueshëm me Ministrinë e Punëve të Brendshme të Maqedonisë së Veriut, Policinë e Kosovës dhe familjarët e të ndjerëve që nga çasti i marrjes së njoftimit për ngjarjen, me qëllim lehtësimin dhe kryerjen e shpejtë të procedurave zyrtare.