Kryetari i Grupit Parlamentar të Partisë Socialiste, Taulant Balla, ka prezantuar në komisionet parlamentare projektligjin për ndryshimet në Kodin Civil, duke e cilësuar atë si një hap me rëndësi në procesin e integrimit të Shqipërisë në Bashkimin Europian.

Në fjalën e tij përpara Komisionit për Europën dhe Punët e Jashtme, Balla u ndal edhe te mungesa e opozitës në punimet parlamentare, duke i bërë thirrje kësaj të fundit t’i rikthehet procesit ligjvënës për votimin e nismave që lidhen me përafrimin e legjislacionit me acquis communautaire.

Ndryshimet e propozuara në Kodin Civil synojnë transpozimin e direktivave europiane për dy çështje kryesore:

Mbrojtjen nga produktet me mangësi: Zgjerohen rregullat dhe përgjegjësitë e prodhuesit ndaj personit të dëmtuar përshtatur me zhvillimet teknologjike, duke përcaktuar se kjo përgjegjësi nuk mund të kufizohet apo përjashtohet me marrëveshje ose ligj.

Luftën kundër pagesave të vonuara: Adresohen shqetësimet e sipërmarrjeve dhe organizatave jofitimprurëse përmes qartësimit të rregullave për kamatëvonesat në transaksionet tregtare, me synim rritjen e sigurisë juridike.

Gjatë ditës së sotme, nisma ligjore është prezantuar prej tij edhe në Komisionin për Ekonominë, Punësimin dhe Financat, si dhe në atë për Çështjet Ligjore dhe Administratën Publike.