Moti i nxehtë afrikan po i vjen fundit, pasi pjesa e dytë e muajit korrik do të sjellë ulje të ndjeshme të temperaturave dhe reshje shiu.

Sipas meteorologes Lajda Porja, dita e sotme shënon kulmin e valës së nxehtë, me vlera që arrijnë deri në 40°C në qytetet kryesore. Të martën parashikohet një rënie e lehtë me 2°C, por me lagështirë të lartë, ndërsa nga dita e mërkurë do të ketë një kthim të theksuar të freskisë, që do të zgjasë deri në fundjavë.

Ndryshimi i motit në Shqipëri:

Temperaturat: Nga e mërkura termometri do të shënojë 34-35°C, ndërsa të premten dhe gjatë fundjavës nuk do t’i kalojë 30-31°C. Edhe temperaturat minimale do të pësojnë rënie, duke i dhënë fund netëve tropikale.

Reshjet dhe era: Të martën në mbrëmje vonë priten reshjet e para në skajin verior. Dita e mërkurë do të sjellë rrebeshe shiu, stuhi dhe erë të fortë në veri e qendër, si dhe në qarkun e Vlorës. Fundjava parashikohet të jetë më e qëndrueshme, por me erë të pranishme si në tokë, ashtu edhe në brigjet detare.

Situata meteorologjike në rajon:

Kosova: Pas ditës së sotme ku maksimalja arrin në 35°C, nga e marta nisin rrebeshet e shiut, ndërsa të premten temperaturat do të ulen deri në 25-26°C. Të pranishme do të jenë stuhitë dhe breshëri.

Maqedonia e Veriut: Sot priten temperatura deri në 38°C në Shkup. Të martën temperaturat ulen lehtë në 35°C me lagështirë të lartë, ndërsa nga e mërkura deri të premten vendi do të përfshihet nga moti i paqëndrueshëm, i freskët dhe me reshje shiu.