Transportonte granata e tritol për shitje në Tiranë, arrestohet nga Policia

Forcat e policisë në Tiranë kanë vënë në pranga një 52-vjeçar të kapur me një sasi municionesh e lëndësh plasëse, të cilat dyshohet se do t’u shiteshin personave të tjerë.

I arrestuari është identifikuar si Petrit Çeça, banues në Fushë-Krujë dhe me precedentë të mëparshëm penalë në fushën e narkotikëve.

Ndalimi i tij u bë në rrugën "Kastriotët" gjatë operacionit të koduar "Porosia", i zhvilluar nga Forca e Posaçme "Shqiponja", Sektori i Operacionales dhe Seksioni për Hetimin e Trafiqeve të Paligjshme.

Gjatë kontrollit në një qese që 52-vjeçari mbante me vete, shërbimet e policisë gjetën dhe sekuestruan në cilësinë e provës materiale:

2 granata dore luftarake dhe 2 ndezës;

600 gramë lëndë plasëse tritol (një pjesë e montuar me fitil e kapsolla detonatore gati për shpërthim);

6 kapsolla detonatore shtesë.

Struktura hetimore po vijon punën për të identifikuar origjinën e lëndëve plasëse, si dhe personat e tjerë të përfshirë në këtë veprimtari kriminale.