Finalja e Kupës së Botës 2026 mes Spanjës dhe Argjentinës nuk ka prodhuar fitues pas 90 minutave të kohës së rregullt. Në stadiumin "MetLife" në New Jersey, dy skuadrat e mbyllën ndeshjen në barazim 0-0, duke e shtyrë verdiktin për kampionen e botës në kohën shtesë.

Spanja dominoi pjesën më të madhe të sfidës, duke kontrolluar ritmin e lojës dhe krijuar rastet më të mira për shënim. "La Roja" mbajti 66% të posedimit të topit dhe regjistroi 14 goditje, nëntë prej tyre në kuadrat, por u ndal vazhdimisht nga një Emiliano Martínez në formë të shkëlqyer.

Në anën tjetër, Argjentina pati vështirësi në fazën sulmuese, duke mos regjistruar asnjë goditje në portën e Unai Simón gjatë kohës së rregullt. Kampionët në fuqi u fokusuan kryesisht në mbrojtje, ndërsa portieri Martínez u shndërrua në protagonistin kryesor me disa pritje vendimtare.

Situata u komplikua edhe më shumë për skuadrën e Lionel Scalonit në minutën e 93-të, kur Enzo Fernández u ndëshkua me kartonin e dytë të verdhë dhe u largua nga fusha, duke e lënë Argjentinën me 10 lojtarë në minutat shtesë.

Statistikat kryesore pas 90 minutave: Posedimi i topit: Spanja 66% – 34% Argjentina Goditje: Spanja 14 – 1 Argjentina Goditje në portë: Spanja 9 – 0 Argjentina Pasime të sakta: Spanja 569 (90%) – Argjentina 268 (80%)

Me rezultatin 0-0, finalja vazhdon në kohën shtesë, ku Spanja do të kërkojë të shfrytëzojë epërsinë numerike për të fituar titullin e dytë botëror, ndërsa Argjentina synon të mbrojë kurorën e kampiones pavarësisht se luan me një futbollist më pak.