Marina ukrainase njofton se një anije tregtare turke, e ngarkuar me grurë, është goditur nga tre raketa ruse gjatë lundrimit në Detin e Zi. Pesë marinarë kanë humbur jetën, ndërsa vijon kërkimi për persona të zhdukur.

Një anije tregtare me flamur turk është goditur nga raketa ruse në Detin e Zi, duke shkaktuar vdekjen e pesë anëtarëve të ekuipazhit, njoftuan autoritetet ukrainase.

Sipas Marinës së Ukrainës, anija transportuese, e cila kishte ngarkesë me grurë, u godit nga tre raketa lundrimi ndërsa po largohej nga zona e konfliktit.

Nga sulmi, tetë persona janë shpëtuar dhe janë transportuar për trajtim mjekësor në një spital në Odesa. Ndërkohë, autoritetet bëjnë të ditur se fati i pesë marinarëve të tjerë mbetet i paqartë.

Kievi e ka dënuar sulmin, duke e cilësuar si një goditje ndaj një mjeti civil të paarmatosur me flamur të huaj.

“Ky është një sulm i ri dhe i qëllimshëm nga Rusia kundër një anijeje civile të paarmatosur me flamur të huaj, e cila nuk përbënte asnjë kërcënim. Ky sulm është një akt terrorist kundër lundrimit paqësor dhe një shkelje serioze e ligjit ndërkombëtar humanitar”, deklaruan autoritetet ukrainase.

Ministri në detyrë i Jashtëm i Ukrainës, Andriy Sibikha, bëri të ditur se pjesa më e madhe e ekuipazhit përbëhej nga shtetas sirianë dhe indianë, ndërsa mes viktimave ishte edhe kapiteni ukrainas i anijes.

“Ndërsa bota vazhdon të reagojë ndaj sulmit brutal të Rusisë gjatë natës në Kiev, Moska vazhdon fushatën e saj të terrorit gjatë gjithë ditës”, u shpreh Sibikha.

Ngjarja vjen në një periudhë të re përshkallëzimi të konfliktit ruso-ukrainas. Gjatë natës së së shtunës dhe të dielës, Rusia kreu sulme me raketa ndaj Kievit, ku u raportua për një viktimë dhe 16 persona të plagosur.

Ndërkohë, forcat ruse kanë vijuar goditjet ndaj infrastrukturës portuale ukrainase, veçanërisht në rajonin e Odesës, një zonë kyçe për eksportin e grurit dhe mallrave të tjera përmes Detit të Zi.