Tiranë – Protestat qytetare në kryeqytet kanë tërhequr vëmendjen edhe për pjesëmarrjen e disa figurave të njohura nga bota e artit, medias dhe televizionit shqiptar.

Këta personazhe, të njohur për publikun e gjerë, kanë lënë përkohësisht angazhimet e tyre profesionale për t’iu bashkuar tubimeve dhe për të shprehur mbështetjen e tyre për kauzat e ngritura nga qytetarët.

Mes figurave të pranishme në protestë janë aktorët Albano Bogdo dhe Irgen Çela, të cilët janë parë duke marrë pjesë në marshime dhe aktivitete të zhvilluara gjatë tubimeve.

Gjithashtu, pjesë e protestave janë bërë edhe këngëtari Klajdi Musabelliu dhe këngëtarja Eranda Libohova, e cila ka tërhequr vëmendjen edhe me një pankartë me mesazh satirik.

Në tubime janë shfaqur gjithashtu analistja Balina Bodinaku, moderatorja Fjoralba Ponari dhe gazetarja Sonila Meço, të cilat kanë qenë të pranishme në disa prej zhvillimeve të protestës.

Një tjetër figurë e komentuar ka qenë blogerja Dea Mishel, e cila është bërë një nga pjesëmarrëset më aktive në protestë. Po ashtu, në tubime janë parë edhe moderatorja Dojna Mema së bashku me bashkëshortin e saj, Vlashentin, si dhe Nikol, e njohur nga programet televizive të formatit reality.

Pjesëmarrja e këtyre figurave publike ka shtuar vëmendjen ndaj protestave, duke sjellë një dimension të ri në angazhimin e personazheve të njohura në çështje me interes publik dhe social.