Kolonët izraelitë kanë sulmuar gjatë natës fshatin Al-Tuwani, në Bregun Perëndimor të pushtuar, duke i vënë flakën një xhamie, dy banesave dhe një objekti për përpunimin e bulmetit. Ngjarja ka rritur më tej tensionet në rajon, në një kohë kur dhuna në zonë vazhdon të përshkallëzohet.

Sipas raportimeve të mediave ndërkombëtare, xhamia Al-Taqwa u përfshi nga flakët, ndërsa në muret e saj u shkruan grafite në gjuhën hebraike. Banorët ndërhynë menjëherë dhe arritën të shuajnë zjarrin, duke parandaluar përhapjen e tij dhe dëme më të mëdha.

Ky incident vjen në një periudhë kur sulmet e kolonëve ndaj komuniteteve palestineze në Bregun Perëndimor janë shtuar ndjeshëm, veçanërisht që pas nisjes së luftës në Gaza.

Policia izraelite bëri të ditur se dislokoi forca në fshat pasi mori njoftime për përplasje, ndërsa konfirmoi se ka nisur një hetim për zbardhjen e rrethanave të ngjarjes. Sipas raportimeve, efektivë të ushtrisë, policisë dhe zjarrfikësve izraelitë mbërritën në vendngjarje rreth 30 minuta pas sulmit.

Aktivisti palestinez Osama Mahamra deklaroi se sulmi ndodhi në prani të ushtrisë izraelite, duke theksuar se një post vëzhgimi ndodhej vetëm pak metra larg xhamisë së djegur.

Ndërkohë, Ministria Palestineze e Çështjeve Fetare e dënoi ashpër ngjarjen, duke e cilësuar atë si një akt terrorist dhe duke akuzuar qeverinë izraelite se po nxit dhunën e kolonëve me synimin për të detyruar palestinezët të largohen nga zonat ku jetojnë.

Edhe Zyra e Kombeve të Bashkuara për Koordinimin e Çështjeve Humanitare (OCHA) ka shprehur shqetësim për përshkallëzimin e dhunës, duke theksuar në një raport të fundit se sulmet e kolonëve izraelitë në Bregun Perëndimor kanë arritur nivele të paprecedenta, me një mesatare prej gjashtë incidentesh në ditë, të shoqëruara me viktima dhe dëme të konsiderueshme materiale.

Sipas të dhënave ndërkombëtare, jashtë Jerusalemit Lindor, rreth tre milionë palestinezë jetojnë në Bregun Perëndimor të pushtuar, së bashku me mbi 500 mijë kolonë izraelitë, të vendosur në vendbanime që konsiderohen të paligjshme sipas së drejtës ndërkombëtare.