Italia është tronditur nga vrasja e gazetarit sportiv Luigi Esposito, 53 vjeç, trupi i të cilit u gjet i karbonizuar në një zonë bujqësore në Eboli, pranë Salernos, në jug të vendit.

Sipas mediave italiane, viktima punonte në Agjencinë Rajonale të Mjedisit dhe ishte bashkëpunëtor i disa mediave lokale. Trupi i tij u zbulua nga zjarrfikësit gjatë ndërhyrjes për shuarjen e një zjarri në shkurre. Për shkak të dëmtimeve të rënda të shkaktuara nga flakët, identifikimi fillestar rezultoi i pamundur.

Hetimet morën një tjetër drejtim pasi pranë vendit të ngjarjes u gjet automjeti i viktimës. Sipas dyshimeve paraprake të hetuesve, Esposito është qëlluar me armë zjarri dhe më pas trupit të tij i është vënë flaka për të fshehur gjurmët e krimit.

Në vendngjarje, karabinierët sekuestruan disa gëzhoja, ndërsa autopsia pritet të përcaktojë shkakun e saktë të vdekjes dhe të hedhë më shumë dritë mbi rrethanat e ngjarjes.

Luigi Esposito ishte një emër i njohur në gazetarinë sportive italiane. Ai kishte bashkëpunuar me gazetën La Città di Salerno, televizionin Ottochannel dhe ishte themelues i portalit sportiv Tuttosalernitana.com. Krahas angazhimit në media, ai ishte diplomuar në biologji dhe kishte përfunduar edhe studimet në letërsi.

Prokuroria e Salernos, nën drejtimin e Raffaele Cantone, ka nisur hetimet dhe po shqyrton të gjitha pistat për identifikimin e autorëve dhe zbardhjen e motivit të kësaj vrasjeje.