Telefoni inteligjent po na dëmton gishtat e mëdhenj – Ja si mund ta parandalojmë këtë

Mënyra se si i përdorim telefonat inteligjentë po shkakton dëme serioze në duart tona dhe mund të çojë në sindromën e tunelit karpal dhe madje edhe në artrit. Mjekët thonë se disa ndryshime të thjeshta në mënyrën se si i përdorim telefonat tanë mund të bëjnë diferencën 

Orë të tëra duke “doomscrolling”, duke paguar fatura apo duke parë episode të plota në telefon – smartphone-i është kthyer në një shprehi e përditshme. Por ky përdorim i vazhdueshëm, me lëvizje të shpeshta dhe shtypje të tastierës, ngarkon duart tona.

“Texting thumb” është një term i përgjithshëm që përfshin dhimbje të ndryshme të lidhura me përdorimin e telefonit: ngurtësi, dhimbje pranë nyjës, ndjesi “klikimi” kur përkulim gishtin e madh.

Nëse nuk trajtohet, kjo lodhje e përsëritur mund të çojë në sindromën e tunelit karpal, artrit ose tendinitin e De Quervain.

“Duart tona nuk janë krijuar për ta përdorur telefonin gjithë ditën,” shpjegon Eugene Tsai, kirurg ortoped në Cedars-Sinai. “Nëse duam t’i përdorim, duhet të kujdesemi për to.”

Smartphone-ët e sotëm janë më të mëdhenj e më të rëndë se modelet e vjetra, dhe mënyra si i përdorim ka ndryshuar. Paralajmërimet nuk janë të reja – dikur flitej për “sindromën e gishtit të BlackBerry” – por koha e tepërt para ekranit i ka bërë dëmtimet nga përdorimi i tepërt më të zakonshme.

Ndryshoni qëndrimin kur mbani telefonin

Mbajtja e kyçeve dhe bërrylave në të njëjtën pozicion për orë të tëra shkakton dhimbje në bazën e gishtit të madh dhe të kyçit. Mbajtja e telefonit në pozicion vertikal për kohë të gjatë lodh edhe gishtat e tjerë.

“Pajisjet mobile janë këtu për të qëndruar. Nuk mund të themi ‘mos e përdorni’, por duhet të gjejmë mënyra që t’i përshtatim me jetën moderne,” thotë Maureen O’Shaughnessy nga Universiteti i Kentakit.

Zgjidhja më e thjeshtë është të kufizoni kohën e përdorimit ose të bëni pushime të shkurtra mes periudhave të gjata të “scroll”-it. Nëse kjo duket e vështirë, provoni të ndryshoni dorën, të përdorni gishtin tregues në vend të gishtit të madh ose të ndryshoni shpesh mënyrën si e mbani pajisjen.

Funksionet e aksesueshmërisë mund të ndihmojnë: përdorimi i diktimit me zë zvogëlon nevojën për tastierë, ndërsa rritja e madhësisë së tekstit bën që të mos e mbani telefonin shumë afër fytyrës.

Aksesoret si mbajtëset në formë unaze ose rrethi shpërndajnë peshën e telefonit më mirë në dorë dhe shërbejnë si bazë për shikimin e videove.

Bëni ushtrime shtrirjeje

Shtrirjet e përditshme mund të lehtësojnë dhimbjen pas përdorimit të gjatë të smartphone-it. Përkulni kyçin duke e shtyrë pëllëmbën drejt dhe larg jush, duke përdorur dorën tjetër për rezistencë të lehtë.

Ndihmon gjithashtu të bëni lëvizje rrethore me gishtat e mëdhenj dhe të përkulni çdo gisht veçmas. Për dhimbje në bazën e gishtit të madh, vendosni dorën mbi një sipërfaqe të sheshtë dhe tërhiqni gishtin e madh larg të tjerëve për rreth 30 sekonda.

Nëse dhimbja, mpirja ose djegia vazhdojnë pavarësisht pushimeve, përdorimit të ilaçeve ose akullit, duhet të konsultoheni me mjekun.

Një pushim i shkurtër për të korrigjuar qëndrimin mund të duket i parëndësishëm, por me kalimin e kohës bën një ndryshim të madh.