Protestat në Iran kishin nisur si një lëvizje kundër rritjes së çmimeve, por më pas u shndërruan në demonstrata kundër qeverisë

Drejtësia iraniane njoftoi sot ekzekutimin me varje, në agim, të dy burrave që akuzoheshin si përgjegjës për vrasjen e policëve gjatë protestave kundër qeverisë që tronditën Iranin në dhjetor dhe janar.

Sipas autoriteteve gjyqësore, Erfan Esfandiari dhe Gol-Mohammad Mohammadi “lidhën policë në një tabelë rrugore me litarë, i plagosën duke u hedhur gurë, i spërkatën me benzinë dhe u vunë flakën”, në Isfahan (Iran qendror). Sipas aktakuzës, dy burrat “filmuan skenën e vrasjes dhe transmetuan pamjet në televizione jashtë vendit”.

Erfan Esfandiari dhe Gol-Mohammad Mohammadi u ekzekutuan sot pas konfirmimit të dënimit të tyre nga Gjykata e Lartë, sqaroi drejtësia.

Njoftimi nuk jep detaje për datën e arrestimit apo të gjyqit të tyre.

Në dhjetor një lëvizje kundërshtimi ndaj pushtetit, e cila fillimisht nisi si protestë kundër rritjes së kostos së jetesës, u shndërrua shpejt në demonstrata masive kundër qeverisë që kulmuan më 8 dhe 9 janar.

Autoritetet iraniane raportuan mbi 3.000 viktima, duke ia atribuar dhunën “akteve terroriste” të orkestruara nga Shtetet e Bashkuara dhe Izraeli. Organizatat joqeveritare me seli jashtë vendit, nga ana e tyre, folën për një shtypje që shkaktoi mijëra viktima.