Policia e Lushnjës ka arrestuar një 36-vjeçar, i dyshuar për kryerjen e dy vjedhjeve brenda dy ditësh dhe për zjarrvënie të qëllimshme në një lokal në fshatin Plug.

Sipas njoftimit zyrtar, operacioni policor i koduar “Again” bëri të mundur zbardhjen e dy rasteve të vjedhjes dhe vënien në pranga të shtetasit me inicialet M. G., banues në zonë, i cili rezulton i dënuar më parë për të njëjtën vepër penale.

Nga hetimet paraprake dyshohet se më 16 korrik, 36-vjeçari ka vjedhur dy bateri automjetesh, ndërsa një ditë më vonë ka hyrë në një lokal në orët e para të mëngjesit, ku ka marrë një shumë parash dhe një kompjuter portativ (laptop).

Sipas Policisë, pas kryerjes së vjedhjes, ai dyshohet se i ka vënë zjarrin lokalit, duke shkaktuar dëme të konsiderueshme materiale.

Autoritetet bëjnë me dije se arrestimi u realizua në kuadër të punës për goditjen e veprimtarive kriminale në fushën e vjedhjeve. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier, e cila do të vijojë me veprimet e mëtejshme hetimore.

Hetimet për dokumentimin e plotë të ngjarjes dhe verifikimin e përfshirjes së mundshme të të arrestuarit në raste të tjera vijojnë.