Një studim i ri italian ka ngritur shqetësime mbi ndikimin e mundshëm të mikroplastikave në shëndetin e zemrës. Hulumtimi, i publikuar në revistën shkencore European Heart Journal, sugjeron se prania e këtyre grimcave në gjak mund të lidhet me një rrezik më të lartë për atak kardiak, megjithëse studiuesit theksojnë se nuk është vërtetuar ende një lidhje shkak-pasojë.

Sipas autorëve të studimit, personat që kishin pësuar një atak kardiak rezultuan të kishin më shumë se dy herë më shumë gjasa të kishin mikroplastika në gjakun e tyre, krahasuar me individët që vuanin nga sëmundje kronike të zemrës ose kishin arterie koronare të shëndetshme.

Autori kryesor i studimit, Pasquale Paolisso nga Spitali Universitar “Sant’Andrea” në Romë, shpjegon se mikroplastikat dhe nanoplastikat janë grimca shumë të vogla plastike që gjenden pothuajse kudo në mjedis, përfshirë ajrin që thithim, ujin që pimë dhe një pjesë të ushqimeve që konsumojmë. Vitet e fundit, këto grimca janë identifikuar edhe në inde dhe organe të trupit të njeriut, duke shtuar interesin shkencor për efektet e tyre të mundshme në shëndet.

Studimi u realizua nga studiues të Universitetit “La Sapienza” në Romë, Universitetit të Veronës dhe Universitetit të Kampanjës “Luigi Vanvitelli” në Napoli, duke përfshirë 61 pacientë që iu nënshtruan angiografisë koronare për shkak të dyshimit për atak kardiak.

Rezultatet treguan se 84,2 për qind e pacientëve që kishin pësuar atak kardiak kishin mikroplastika në gjakun e marrë nga arteriet koronare ose enët periferike, një përqindje dukshëm më e lartë krahasuar me grupet e tjera të studimit. Lloji më i zakonshëm i plastikës i identifikuar ishte polietileni, material që përdoret gjerësisht në ambalazhe dhe produkte të konsumit.

Hulumtimi evidentoi gjithashtu se mikroplastikat ishin më të pranishme te personat e ekspozuar ndaj ndotjes së ajrit dhe te duhanpirësit. Sipas të dhënave, duhanpirësit kishin rreth gjashtë herë më shumë gjasa të kishin këto grimca në gjak.

Studiuesit dyshojnë se pirja e duhanit mund të lehtësojë depërtimin e mikroplastikave dhe nanoplastikave në qarkullimin e gjakut përmes mushkërive, ndërsa ndotja e ajrit mund të ndikojë në mënyrë të ngjashme.

Profesori Emanuele Barbato, nga Universiteti “La Sapienza” dhe drejtues i Njësisë së Kardiologjisë në Spitalin Universitar “Sant’Andrea”, theksoi se rezultatet nuk provojnë se mikroplastikat shkaktojnë atak kardiak, por tregojnë një lidhje të fortë mes ekspozimit ndaj ndotjes mjedisore, pranisë së mikroplastikave në gjak dhe sëmundjeve kardiovaskulare.

Ekspertët nënvizojnë se nevojiten studime të mëtejshme për të kuptuar më mirë rolin që këto grimca mund të kenë në zhvillimin e sëmundjeve të zemrës.