Presidenti i Hungarisë, Tamás Sulyok, ka firmosur amendamentin kushtetues që i jep fund mandatit të tij, duke i hapur rrugë zgjedhjes së një presidenti të ri nga Parlamenti brenda 30 ditëve.

Largimi i Sulyok vjen pas presionit të qeverisë së re të kryeministrit Péter Magyar, e cila e konsideron këtë hap pjesë të reformave për largimin nga institucionet të zyrtarëve të emëruar gjatë qeverisjes së ish-kryeministrit Viktor Orbán.

Amendamenti, i miratuar nga shumica parlamentare, parashikon përfundimin e menjëhershëm të mandatit të presidentit. Edhe pse Sulyok e kundërshtoi masën, duke e cilësuar si një goditje ndaj shtetit të së drejtës, ai deklaroi se ishte i detyruar ta nënshkruante sipas procedurave kushtetuese.

Sipas qeverisë, ndryshimet janë pjesë e një procesi të gjerë reformash për të çmontuar ndikimin e mbetur të administratës së Orbán dhe për të ristrukturuar institucionet shtetërore. Kryeministri Péter Magyar kishte kërkuar vazhdimisht dorëheqjen e Sulyok, duke e akuzuar se nuk kishte ushtruar siç duhet rolin e presidentit për të frenuar, sipas tij, veprimet antidemokratike të qeverisë së mëparshme.

Mandati i Sulyok do të përfundojë në mesnatën e së hënës. Deri në zgjedhjen e presidentit të ri, detyrat e kreut të shtetit do të ushtrohen përkohësisht nga kryetarja e Parlamentit, Ágnes Forstthoffer.

Që nga marrja e pushtetit, qeveria e re ka ndërmarrë një sërë reformash, duke shkarkuar zyrtarë të emëruar gjatë periudhës së Orbán, pezulluar shërbimin informativ të medias publike dhe mbyllur Zyrën për Mbrojtjen e Sovranitetit, të cilën opozita e kishte akuzuar se përdorej për të ushtruar presion ndaj mediave dhe kritikëve të qeverisë së mëparshme.

Amendamenti kushtetues përfshin gjithashtu reforma në sistemin gjyqësor, krijimin e një strukture për hetimin e abuzimeve financiare të dyshuara gjatë qeverisjes së Orbán dhe vendosjen e një kufiri prej 12 vitesh për mandatet e ligjvënësve.

Ish-kryeministri Viktor Orbán reagoi pas nënshkrimit të amendamentit, duke deklaruar se "tirania nuk është më një kërcënim, por një realitet", ndërsa paralajmëroi se largimi i presidentit krijon një precedent të rrezikshëm për institucionet e vendit.