Hetimet për vrasjen e Edmond Sulës në Bërxullë vijojnë në disa pista, ndërsa një javë pas atentatit autoritetet kanë zbuluar një tjetër element që po verifikohet.

Sipas burimeve hetimore, 50-vjeçari rezultonte bashkëaksioner në një kompani të licencuar për kultivimin e kanabisit mjekësor në Maqedoninë e Veriut.

Për këtë arsye, autoritetet shqiptare pritet t’u kërkojnë zyrtarisht homologëve maqedonas informacion mbi aktivitetin e tij në këtë shtet, për të verifikuar nëse ka pasur konflikte që mund të lidhen me atentatin.

Një tjetër pistë ku janë përqendruar hetimet është aktiviteti i Sulës në fushën e shitblerjes së pronave.

Hetuesit po verifikojnë konfliktet e mundshme që ai mund të ketë pasur në këtë veprimtari, e cila konsiderohet aktualisht një nga pistat kryesore për zbardhjen e motivit të krimit.

Edmond Sula u ekzekutua më 12 korrik, teksa po hynte në banesën e tij në Bërxullë. Sipas të dhënave paraprake të grupit hetimor, ai u vra me një plumb të vetëm, të qëlluar me një armë me precizion të lartë, të pajisur me dylbi.

Hetuesit dyshojnë se autori ka qëlluar nga një distancë e konsiderueshme. Në vendngjarje nuk është gjetur asnjë gëzhojë, element që përforcon dyshimet se atentati ka qenë i planifikuar me kujdes dhe është kryer me mjete të sofistikuara.

Policia dhe Prokuroria vijojnë hetimet për identifikimin e autorëve dhe zbardhjen e plotë të motiveve të ekzekutimit.