Janë zbardhur emrat dhe detaje të reja nga ngjarja e ndodhur mbrëmjen e kaluar në fshatin Vajkal të Bulqizës, ku një person mbeti i plagosur me armë gjahu.

Burime policore thanë për noa.al se Artur Çupi dyshohet se ka plagosur aksidentalisht Naxhi Bicin, i cili u dërgua në spital dhe ndodhet jashtë rrezikut për jetën.

Ngjarja ndodhi rreth orës 23:00, në një zonë bujqësore të fshatit. Sipas të dhënave paraprake, Çupi ka qëlluar me armë gjahu tip çifte, pasi ka dyshuar se në tokën e mbjellë ndodheshin kafshë të egra që po dëmtonin të mbjellat.

Pas të shtënave, ai ka konstatuar se kishte plagosur aksidentalisht një person.

I plagosuri, Naxhi Bici, është transportuar me urgjencë në Spitalin e Bulqizës, ku ka marrë ndihmën mjekësore. Gjendja e tij raportohet jashtë rrezikut për jetën.

Policia ka kryer veprimet e para në vendngjarje dhe po vijon hetimet për të sqaruar plotësisht dinamikën e incidentit. Materialet pritet t’i referohen Prokurorisë për veprime të mëtejshme.