Dalín emrat e të arrestuarve në Kavajë, dyshohet se mbajtën të mbyllur punonjësit e Tatimeve në resortin Prestige në Golem

Janë zbardhur emrat e pesë personave të arrestuar në Kavajë, pasi dyshohet se mbajtën të mbyllur për një kohë të konsiderueshme punonjësit e Task Forcës së Drejtorisë së Përgjithshme të Tatimeve brenda ambienteve të resortit Prestige në Golem.

Të arrestuarit janë administratori i resortit, Saimir Ndreca, 34 vjeç, shefi i financës, Zaho Jaçaj, 56 vjeç, shefi i sigurisë, Artan Kasa, 56 vjeç, si dhe dy punonjësit e sigurisë, Hamid Sula, 64 vjeç dhe Bujar Agolli, 57 vjeç.

Arrestimi i tyre u krye nga specialistët për Hetimin e Krimit në Komisariatin e Policisë Kavajë, pas kallëzimit të bërë nga punonjësit e Task Forcës së Drejtorisë së Përgjithshme të Tatimeve.

Sipas policisë, ngjarja ka ndodhur më 18 korrik 2026, brenda ambienteve të resortit Prestige në Golem, ku punonjësit e Tatimeve ndodheshin duke ushtruar detyrën.

Pesë të arrestuarit dyshohet se, në bashkëpunim me njëri-tjetrin, kanë penguar punonjësit e Task Forcës dhe i kanë mbajtur të mbyllur për një kohë të konsiderueshme në ambientet e resortit.

Ata akuzohen për veprën penale “Heqja e paligjshme e lirisë”.

Materialet procedurale i janë referuar Prokurorisë për veprime të mëtejshme.