Një ngjarje e rëndë është regjistruar mbrëmjen e kaluar në fshatin Vajkal të Bulqizës, ku një person ka mbetur i plagosur aksidentalisht me armë gjahu.

Sipas të dhënave paraprake, ngjarja ka ndodhur rreth orës 23:00 në një zonë bujqësore të fshatit.

"Artur Çupi ka plagosur aksidentalisht Naxhi Bicin i cili u dërgua në spital dhe ndodhet jashtë rrezikut për jetën", thanë për noa.al burime policore.

Autori dyshohet se ka qëlluar me armë gjahu tip çifte, pasi ka menduar se në tokën e mbjellë ndodheshin kafshë të egra që po dëmtonin të mbjellat.

Pas të shtënës, ai ka konstatuar se kishte plagosur një person. I dëmtuari është transportuar në Spitalin e Bulqizës, ku ka marrë ndihmën e nevojshme mjekësore dhe, sipas informacioneve paraprake, ndodhet jashtë rrezikut për jetën.

Në vendngjarje kanë mbërritur shërbimet e Policisë, të cilat kanë nisur hetimet për zbardhjen e plotë të rrethanave të ngjarjes.

Grupi hetimor po kryen verifikimet përkatëse për të përcaktuar dinamikën e saktë të incidentit dhe përgjegjësitë ligjore të personit të përfshirë.