Një person ka mbetur i plagosur mbrëmjen e kaluar në fshatin Vajkal të bashkisë Bulqizë, pasi u qëllua me armë gjahu tip çifte.

Ngjarja është regjistruar rreth orës 23:00, në një zonë bujqësore të fshatit.

"Artur Çupi ka plagosur aksidentalisht Naxhi Bicin i cili u dërgua në spital dhe ndodhet jashtë rrezikut për jetën", thanë për noa.al burime policore.

Sipas të dhënave paraprake, autori ka përdorur armën e gjahut pasi ka dyshuar se në tokën e mbjellë ndodheshin kafshë të egra, të cilat po i dëmtonin të mbjellat.

Pas të shtënave, ai ka konstatuar se nuk kishte qëlluar kafshë, por kishte plagosur një person.

I plagosuri është dërguar me urgjencë në Spitalin e Bulqizës, ku ka marrë ndihmën e parë mjekësore. Sipas burimeve spitalore, gjendja e tij është jashtë rrezikut për jetën.

Në vendin e ngjarjes kanë mbërritur shërbimet e Policisë, të cilat kanë kryer veprimet e para procedurale dhe kanë nisur hetimet për zbardhjen e plotë të rrethanave.

Policia po verifikon dëshmitë dhe provat e mbledhura për të sqaruar dinamikën e incidentit, ndërsa ndaj autorit pritet të merren masat procedurale në varësi të rezultateve të hetimit.