Finalja e Kupës së Botës 2026 mes Spanjës dhe Argjentinës ka bërë që një pjesë e madhe e autoriteteve më të larta spanjolle të udhëtojnë drejt New Jersey-t për të ndjekur nga afër sfidën historike.

Në stadiumin MetLife pranë Nju Jorkut do të jenë të pranishëm Mbreti Felipe VI, Mbretëresha Letizia, Princesha Leonor, Infanta Sofía, si dhe kryeministri Pedro Sánchez me anëtarë të qeverisë spanjolle.

Për shkak të numrit të lartë të zyrtarëve dhe kërkesave të sigurisë, Forcat Ajrore Spanjolle kanë aktivizuar një plan të posaçëm transporti. Katër avionë ushtarakë — dy Airbus A-310 dhe dy avionë Falcon — janë nisur nga baza ajrore Torrejón de Ardoz drejt Nju Jorkut.

Organizimi i udhëtimit është ndikuar edhe nga rregullat e sigurisë së Familjes Mbretërore, sipas të cilave Mbreti dhe Princesha e Kurorës nuk duhet të udhëtojnë në të njëjtin avion, për të mbrojtur vijimësinë e trashëgimisë mbretërore në rast emergjencash.

Sipas planit të udhëtimit, Mbreti Felipe VI, Mbretëresha Letizia, Infanta Sofía dhe kryeministri Pedro Sánchez do të udhëtojnë me një Airbus A-310, ndërsa Princesha Leonor do të udhëtojë me një avion Falcon.

Avioni Falcon, për shkak të autonomisë më të kufizuar të fluturimit, do të duhet të bëjë një ndalesë teknike në Azore për furnizim me karburant përpara mbërritjes në SHBA.

Airbus A-310 është avioni i vetëm në dispozicion të Forcave Ajrore Spanjolle që mund të kryejë kalimin direkt transatlantik pa ndalesë dhe ofron gjithashtu ambiente më të përshtatshme për udhëtime të gjata.

Finalja mes Spanjës dhe Argjentinës pritet të jetë një nga ngjarjet më të ndjekura sportive të vitit, ndërsa Madridi zyrtar kërkon të jetë i pranishëm në një moment që mund të sjellë titullin e dytë botëror për “La Roja”.